Верошпирон 25 мг № 20 табл

Сипаттама

Дәрілік затты медициналық қолдану жөніндегі нұсқаулық

Верошпирон^®

Саудалық атауы

Верошпирон^®

Халықаралық патенттелмеген атауы

Спиронолактон

Дәрілік түрі

Таблеткалар, 25 мг

Құрамы

Бір таблетканың құрамында

белсенді зат - 25 мг спиронолактон

қосымша заттар: сусыз коллоидты кремнийдің қостотығы, магний стеараты, тальк, жүгері крахмалы, лактоза моногидраты.

Сипаттамасы

Дөңгелек пішінді, жалпақ, ойықты, өзіне тән меркаптан иісі және бір жағында «VEROSPIRON» таңбасы бар, түсі ақ дерлік таблеткалар.

Фармакотерапиялық тобы

Жүрек-қантамыр жүйесі. Диуретиктер. Калий жинақтаушы диуретиктер. Альдостерон антагонистері. Спиронолактон.

АТХ коды С03D А01

Фармакологиялыққасиеттері

Фармакокинетикасы

Спиронолактонның асқазан-ішек жолынан тез және толық сіңіріледі. Плазмаақуыздарымен ол едәуір дәрежеде (шамамен 90%) байланысады. Спиронолактон жылдам метаболизмге ұшырайды. Оның белсенді метаболиттері 7α-тиометилспиронолактон және канренон болып табылады. Спиронолактонның жартылай шығарылу кезеңінің қысқа (1,3 сағат) екеніне қарамастан, оның белсенді метаболиттерінің жартылай шығарылу кезеңдері ұзақтау (2,8-ден 11,2 сағатқа дейін). Метаболиттері, ең алдымен, несеппен экскрецияланады, шағын бөлігі нәжіспен экскрецияланады. Спиронолактон және оның метаболиттері плацента арқылы өтеді және ана сүтімен экскрецияланады.

Пациенттер 100 мг спиронолактонды 15 күн бойы күнделікті тамақтанудан қабылдағаннан кейін спиронолактонның плазмадағы жоғары шекті концентрациясына жетуге дейінгі уақыт (t_max), плазмадағы жоғары шекті концентрациясы (C_max) және жартылай шығарылу кезеңі (Т_1/2) көрсеткіштері:тиісінше, 2,6 сағат, 80 нг/мл және шамамен 1,4 сағат. 7α-тиометилспиронолактон және канренон үшін осы көрсеткіштер, тиісінше, 3,2 және 4,3 сағат; 391 нг/мл және 181 нг/мл; 13,8 және 16,5 сағат құраған.

Спиронолактонның бір реттік дозасының бүйрекке ықпал етуі 7 сағат өткенде жоғары шегіне жетіп, кем дегенде 24 сағат бойы сақталады.

Фармакодинамикасы

Спиронолактон – альдостеронның бәсекелі антагонисі. Ол нефронның дистальді өзекшелерінде әрекет етіп, натрий иондарымен судың кідірісін, сондай-ақ альдостерон әсерлері - калий иондарының экскрециясын тежейді. Ол Na⁺ және Cl^- экскрециясын арттырып қана қоймай, несеппен К⁺ экскрециясын төмендетеді – ол Н⁺ экскрециясын да төмендетеді. Өзінің диуретикалық әсерінің нәтижесі ретінде, ол гипотензиялық әсерге ие болады.

Қолданылуы

- іркілісті жүрек жеткіліксіздігінде, пациентте басқа диуретиктермен емдеуге жауап беру байқалмайтын немесе олардың әсерлерін үдету қажет болатын жағдайларда

- эссенциальді артериялық гипертензияда, ең алдымен, гипокалиемия жағдайларында, әдетте басқа гипертензияға қарсы препараттармен біріктіріп

- ісінулермен және/немесе асцитпен қатар жүретін бауыр циррозында

- бастапқы гиперальдостеронизмді емдеуде

- нефроздық синдромнан болатын ісінулерде

- гипокалиемияны емдеуде (басқа ем алу мүмкін емес жағдайларда)

- жүрек гликозидтерін алатын пациенттердегі гипокалиемияның профилактикасында, басқа ұстанымдар мақсатқа сай емес немесе сәйкес келмейтін болып қарастырылатын жағдайларда

Қолдану тәсілі және дозалары

Дозалау сызбасы

Ересектер

Бастапқы гиперальдостеронизм

Диагностикалық мақсаттар үшін

• Ұзақ тест: спиронолактон тәулігіне 400 мг 3-4 апта қабылдайды. Гипокалиемия және артериялық гипертензияны түзетуге қол жеткізгенде бастапқы гиперальдостеронизм болуын болжамдауға болады.
• Қысқа тест: спиронолактон тәулігіне 400 мг 4 күн бойы қабылданады. Верошпирон^® препаратын қабылдау кезінде қанда калий мөлшері артқанда және оны тоқтатқаннан кейін төмендегенде бастапқы гиперальдостеронизм болуын болжамдауға болады.

Емдеу

Хирургиялық емге дайындық кезінде спиронолактонды 100-ден 400 мг дейінгі дозаларда қолданады. Егер операция тағайындалмаса, спиронолактонды ең аз тиімді дозада ұзақ демеуші ем үшін қолдануға болады. Мұндай жағдайда препараттың бастапқы дозасы ең аз тиімді дозаға жеткенге дейін әрбір 14 күн сайын азайтылуы мүмкін. Верошпирон^® препаратын ұзақ қолданғанда жағымсыз әсерлерінің айқындығын төмендету үшін басқа диуретиктермен біріктірілімде қолдану ұсынылады.

Іркілісті жүрек жеткіліксіздігі немесе нефроздық синдром аясындағы ісінулер

Бастапқы доза 100 мг құрайды және тәулігіне 25-тен 200 мг дейінгі аралықта өзгеруі мүмкін, препаратты 1-2 қабылдау ішінде қолдануға болады. Препараттың анағұрлым жоғары дозаларын қабылдағанда Верошпирон^® бүйрек өзекшерінің анағұрлым проксимальді бөлімінде әсер ететін диуретикпен бірге қолданылуы мүмкін. Мұндай жағдайда Верошпирон^® препаратының дозасын түзету керек.

Жүректің ауыр жеткіліксіздігін емдеген кезде қосымша ем (Нью-Йорк кардиологиялық қауымдастығының (NYHA) жіктеуі бойынша III-IV класс және лықсыту фракциясы ≤35%)

Егер қан сарысуында калий мөлшері 5,0 мЭкв/л аспайтын болса, ал креатинин концентрациясы қан сарысуында 2,5 мг/дл аспайтын болса, қолданудың басында базалық стандартты ем аясында спиронолактонның дозасы тәулігіне 25 мг құрауы тиіс. Тәулігіне 25 мг дозада препарат жағымдылығы жақсы пациенттерге клиникалық көрсетілімдері бойынша дозаны тәулігіне 50 мг дейін арттыруға болады. Препарат жақпайтын пациенттерге тәулігіне 25 мг дозада, препарат дозасын 2 күнде бір рет 25 мг дейін төмендетуге болады («Айрықша нұсқаулар» бөлімін қараңыз).

Бұрын қолданылған гипотензиялық препараттардың тиімділігі жеткіліксіз болған жағдайда артериялық гипертензияны емдеу кезіндегі қосымша ем

Спиронолактонның бастапқы дозасы басқа гипотензиялық препараттармен бір мезгілде қолданғанда тәулігіне 25 мг құрайды. Егер 4 апта өткеннен кейін артериялық қысым мақсатты мәніне жетпесе, препараттың дозасын екі еселеуге болады. Гиперкалиемия дамуын туындатуы мүмкін препаратты қабылдайтын артериялық гипертензиясы бар пациенттерде (мысалы, ангиотензин-өзгертетін фермент (АӨФ) тежегіштері немесе ангиотензин рецепторларының блокаторлары), спиронолактон қолдануды бастағанға дейін қан сарысуында калий және креатинин мөлшерін бағалау керек. Қан сарысуында калий мөлшері 5,0 ммоль/л асатын, ал креатинин концентрациясы қан сарысуында 2,5 мг/дл асатын пациенттерге Верошпирон^® препаратын қолданбаған жөн. Спиронолактон қабылдауды бастағаннан кейін 3 ай ішінде қандағы калий және креатинин мөлшерін мұқият бағалау керек.

Асцит және бауыр циррозына байланысты ісінулер

Егер несепте Na⁺/K⁺ иондарының арақатынасы 1,0 асатын болса, препараттың тәуліктік дозасы 100 мг құрауы тиіс. Егер көрсетілген арақатынасы 1,0 аз болса, препарат дозасы тәулігіне 200-ден 400 мг дейінгі аралықта болуы тиіс.

Демеуші доза әрбір пациент үшін жекелей белгіленуі тиіс.

Гипокалиемия

Егер калий препараттарын немесе басқа калий жинақтаушы әдістерді қолдану жеткіліксіз болатын болса, препарат тәулігіне 25-100 мг дозада тағайындалады.

18 жасқа дейінгі балар мен жасөспірімдер

Препараттың бастапқы дозасы 1-4 қабылдауға тәулігіне дене салмағына 1-3 мг/кг құрайды. Демеуші ем жүргізгенде немесе басқа диуретиктермен бір мезгілде қолданғанда спиронолактон дозасы дене салмағына 1-2 мг/кг дейін төмендетілуі тиіс.

Қажет болғанда ұсақталған 25 мг таблеткадан (әсіресе 6 жасқа дейінгі балаларға) суспензия дайындауға болады.

Егде жастағы пациенттер

Препаратпен емдеуді ең жоғары қажетті әсеріне жеткенге дейін оны біртіндеп ұлғайта отырып ең аз дозадан бастау ұсынылады. Спиронолактон метаболизмі мен шығарылуына әсер етуі ықтимал бүйрек пен бауырдың ауыр бұзылулары бар пациенттерде сақ болу керек. Сонымен қоса, препаратты егде жастағы пациенттерде қолданғанда гиперкалиемияның даму қаупін ескерген жөн («Айрықша нұсқаулар» бөлімін қараңыз).

Қолдану тәсілі

Әдетте, спиронолактонның тәуліктік дозасы тамақтанудан кейін тәулігіне 1 немесе 2 рет қабылданады. Тәуліктік дозаны немесе препараттың тәуліктік дозасының бірінші бөлігін таңертең қабылдау ұсынылады.

Жағымсыз әсерлері

Өте жиі (˃1/10)

- гиперкалиемия (бүйрек жеткіліксіздігі бар және калий препараттарын алатын пациенттерде)

- аритмия(бүйрек жеткіліксіздігі бар және калий препараттарын алатын пациенттерде)

- либидо төмендеуі, эректильді дисфункция, гинекомастия (ерлерде), сүт безінің ауырсынуы, кеуденің ауыруы (ерлерде), сүт безінің ұлғаю, етеккір бұзылулары (әйелдерде)

Жиі (˃1/100, <1/10)

- гиперкалиемия (егде жастағы пациенттерде, диабетиктерде және АӨФ тежегіштерін қабылдайтындар)

- жүрек айну, құсу

- бедеулік (жоғары дозаларын пайдаланған жағдайда (тәулігіне 450 мг))

Жиі емес (˃1/1000, <1/100)

- бас ауыру, сананың шатасуы, ұйқышылдық (бауыр циррозы бар пациенттерде), астения, шаршау, бас айналу, бұлшықеттердің түйілуі, атаксия, балтыр бұлшықеттерінің құрысуы

Сирек (˃1/10000, <1/1000)

- аса жоғары сезімталдық

- гипонатриемия, дегидратация, порфирия

- гастрит, ойық жара, асқазаннан қан кету, асқазанның ауыруы, диарея, іш қату

- бөртпе, есекжем, гиперемия

Өте сирек (<1/10000)

- тромбоцитопения, эозинофилия, мегалобластоз

- лейкопения (агранулоцитозды қоса)

- гирсутизм

- салдану, параплегия

- васкулит

- дауыс тембрінің өзгеруі

- гепатит

- алопеция, экзема, сақина тәрізді эритема, терінің жегі тәріздес зақымдануы, макула-папулезді және эритематозды бөртпе, дәрілік қызба, қышыну

- остеомаляция

- жедел бүйрек жеткіліксіздігі

- қан сарысуындағы мочевина мөлшерінің жоғарылауы, гиперкреатининемия

Жиілігі белгісіз

- гиперхлоремиялық ацидоз немесе алкалоз

- жағымсыз гипотензия

- буллезді пемфигоид (әдетте, ұзақ қолданған кезде)

- гликозилденген гемоглобин мөлшерінің артуы (HbA1c)

- Стивенс-Джонсон синдромы (SJS), уытты эпидермалық некролиз (TEN), эозинофилиямен және жүйелік симптомдармен дәрілік бөртпе (DRESS), гипертрихоз, бауыр функциясының бұзылуы, дімкәстік, сүт бездерінің қатерсіз ісігі, электролит алмасуының бұзылуы.

Жағымсыз әсерлер, әдетте, препаратты тоқтатқаннан кейін басылады.

Жағымсыз реакцияларға күмәндану туралы хабарлар

Осы препаратқа жағымсыз дәрілік реакцияларына күмәндану туралы хабарлап отыру қажет. Бұл осы дәрілік затқа «пайда/қауіп» арақатынасына мониторинг жүргізуді жалғастыруға мүмкіндік береді. Денсаулық сақтау саласы қызметкерлерінен жағымсыз реакцияларға барлық күмәнданулар жайында ұлттық ақпарат жүйесін пайдалана отырып хабарлауды өтінеді. Егер көрсетілген жағымсыз әсерлерінің кез келгені ушығатын болса, немесе Сіз нұсқаулықта көрсетілмеген кез келген басқа жағымсыз әсерлерін байқасаңыз, бұл жайында емдеуші дәрігерге хабарлаңыз.

Қолдануға болмайтын жағдайлар

- әсер етуші затқа немесе «Құрамы» бөлімінде аталған қосымша заттардың кез келгеніне жоғары сезімталдық.

- анурия, жедел бүйрек жеткіліксіздігі, бүйректің азот бөлу функциясының айқын бұзылуы (шумақтық сүзіліс жылдамдығы <10 мл/мин).

- жүрек қызметінің жеткіліксіздігі (шумақтық сүзілу жылдамдығы 30 мл/мин кем немесе креатининнің сарысу концентрациясы 220 мкмоль/л астам)

- эплеренон немесе басқа калий жинақтаушы диуретиктерді бір мезгілде қолдану

- гиперкалиемия, гипонатриемия.

- жүктілік және лактация кезеңі.

- Аддисон ауруы.

- 6 жасқа дейінгі балалар.

- галактоза жақпаушылығы, толық лактаза жеткіліксіздігі немесе глюкоза-галактоза мальабсорбциясы синдромы сияқты сирек тұқым қуалайтын аурулары бар пациенттерге.

Дәрілермен өзара әрекеттесуі

Верошпирон^® препаратын:

-басқа калий жинақтаушы диуретиктермен, АӨФ тежегіштерімен, ангиотензин II рецепторлары антагонистерімен, альдостерон блокаторларымен, калий препараттарымен қатар қабылдау, сондай-ақ калийге бай диетаны ұстану, немесе құрамында калий бар тұз алмастырғыштарын тұтыну ауыр гиперкалиемия дамуына әкелуі мүмкін.

• Нақты гиперкалиемия туындататын дәрілік заттардан басқа, триметоприм/сульфаметоксазол (ко-тримоксазол деп аталатын антибиотик) біріктірілімін спиронолактонмен бір мезгілде қолдану клиникалық мәнді гиперкалиемияға әкелуі мүмкін.
• Дигоксин – спиронолактон дигоксиннің жартылай шығарылу кезеңін ұзартуы мүмкін, бұл оның қан сарысуында дигоксин концентрациясының артуына және соның салдарынан, оның уыттылығының күшеюіне әкелуі ықтимал. Спиронолактон қабылдағанда дигоксин дозасын төмендету қажет болуы мүмкін. Дигоксинмен артық дозалануын немесе дигитализация жеткіліксіздігін болдырмау үшін пациенттің жағдайын мұқият бағалау керек.
• Флуориметриялық талдау кезінде спиронолактон флуоресценций (мысалы, кортизол, эпинефрин) баламалы параметрлерімен қосылыстар мөлшерін талдау нәтижелеріне әсер етуі мүмкін.
• Антипирин – спиронолактон антипирин метаболизмін жылдамдатады.
• Литий препараттары – әдетте, литий препараттарын диуретиктермен бірге қолданбаған жөн. Диуретиктер литийдіңбүйрек клиренсін төмендетеді жәнелитий препараттарының уытты әсерлерінің даму қаупін арттырады.
• Карбеноксолон – организмде натрий іркілісін туындатуы, соның салдарынан спиронолактонның тиімділігін төмендетуі мүмкін. Карбеноксолон және спиронолактонды бір мезгілде қолдануды болдырмаған жөн.
• Карбамазепин – диуретиктермен бір мезгілде қолданғанда препарат клиникалық мәнді гипонатриемияны туындатуы мүмкін.
• Гепарин, төмен молекулалы гепарин – спиронолактонмен бір мезгілде қолдану ауыр гиперкалиемияға әкелуі мүмкін.
• Кумарин туындылары – препаратосы топтың препараттарының тиімділігін төмендетеді.
• Спиронолактон ГнРГ аналогтары (гонадотропин-релизинг-гормон): трипторелин, бусерелин, гонадорелиннің әсерін күшейтуі мүмкін.

- Басқа диуретиктер қолдану – диурезді күшейтеді.

• Иммунодепрессанттар, циклоспорин және такролимус спиронолактон туындататын гиперкалиемияның даму қаупін арттыруы мүмкін.
• Колестирамин, аммоний хлориді гиперкалиемия және гиперхлоремиялық метаболизмдік ацидоздың даму қаупін де жоғарылатуы мүмкін.
• Трициклді антидепрессанттар және психозға қарсы дәрілер спиронолактонның гипертензияға қарсы әсерін күшейтуі мүмкін.
• Гипотензиялық дәрілер – спиронолактон гипотензиялық препараттардың әсерін үдетеді, дозасын спиронолактонмен бір мезгілде қабылдаған кезде төмендету және одан әрі қажеттілік жағдайында түзету қажет болуы ықтимал. АӨФ тежегіштері альдостерон өндірілуін төмендететін болғандықтан, осы топ препараттарын спиронолактонмен біріктіріп тұрақты негізде, әсіресе бүйрек функциясының бұзылуы анықталған пациенттерде пайдаланбаған жөн.
• Нитроглицеринмен, өзге нитраттармен немесе вазодилататорлармен бір мезгілде қабылдау спиронолактонның гипертензияға қарсы әсерін күшейтуі мүмкін.
• Алкоголь, барбитураттар немесе есірткілік препараттар –спиронолактонмен байланысты ортостаздық гипотензияны үдетуі мүмкін.
• Прессорлы аминдер (норэпинефрин) – спиронолактон норэпинефринге қантамырлық реакцияны төмендетеді. Осы себептен спиронолактон қабылдайтын пациенттерде жергілікті немесе жалпы анестезия жүргізгенде сақ болу керек.
• Қабынуға қарсы стероидты емес препараттар (ҚҚСП) – ҚҚСП қабылдау кейбір пациенттерде ілмектік, калий жинақтаушы және тиазид диуретиктерініңдиурездік, натрийурездік және гипертензияға қарсы әсерін төмендетуі мүмкін. ҚҚСП (мысалы,ацетилсалицил қышқылы, индометацин және мефенам қышқылы) бір мезгілде калий жинақтаушы диуретиктермен қолдану ауыр гиперкалиемия дамуына әкелуі мүмкін. Осылайша, спиронолактонды ҚҚСП бір мезгілде қабылдағанда пациенттің жай-күйін несеп айдайтын препараттың қалаулы әсерге жеткізуін мұқият бақылаған жөн.

–Глюкокортикостероидтар, АКТГ – электролиттердің шығарылу жылдамдығы артуы, атап айтқанда гипокалиемиябайқалуы мүмкін.

-Зертханалық зерттеу нәтижелеріне препараттың әсері – әдебиетте спиронолактон немесе оның метаболиттерінің дигоксин концентрациясының радиоиммундық талдау әдісімен анықталған көрсеткіштеріне әсер етудің бірнеше жағдайлары сипатталған.

Айрықша нұсқаулар

• Негізгі аурулары ацидоз және/немесе гиперкалиемияның дамуына түрткі болатын пациенттерде спиронолактонды ерекше сақтықпен қолдану керек.
• Диабеттік нефропатиясы бар пациенттерде гиперкалиемияның даму қаупі жоғары болады.
• Спиронолактон қабылдау қан мочевина азотының (ҚМА) транзиторлық жоғарылауын, әсіресе бүйрек функциясының бұзылуы болған және гиперкалиемия аясында туындатуы мүмкін. Спиронолактон қайтымды гиперхлоремиялық метаболизмдік ацидоз туғызуы мүмкін. Осылайша, препаратты қолдану бүйрек және бауыр функциясы бұзылған пациенттерде, сондай-ақ егде жастағы пациенттерде қан сарысуында электролиттер көрсеткіштерін және бүйрек функциясын ұдайы бақылап отыру қажет.
• Спиронолактонды гиперкалиемия туындататын препараттармен (мысалы, басқа калий жинақтаушы диуретиктер, АӨФ тежегіштері, ангиотензин II рецепторларының антагонисі, альдостерон блокаторлары, гепарин, төмен молекулалы гепарин, калий препараттары, калийге бай диета, құрамында калий бар тұз алмастырғыштарын тұтыну) бір мезгілде қолдану ауыр гиперкалиемия дамуына әкелуі мүмкін.

• Гиперкалиемия өлімге әкеп соғуы мүмкін. Спиронолактон қабылдайтын жүрек жеткіліксіздігінің ауыр түрі бар пациенттерде калий мөлшерін бақылап отыру мен түзетудің маңызы зор. Препаратты басқа калий жинақтаушы диуретиктермен бірге қолданбаған жөн. Сарысудағы калий мөлшері 3,5 мЭкв/л жоғары пациенттерге калий препараттарын қолдануға болмайды. Калий және креатинин мөлшеріне мониторинг жүргізудің ұсынылатын жиілігі - препарат қабылдауды бастағаннан немесе спиронолактон дозасын арттырғаннан кейін бір аптадан соң, алғашқы 3 ай ішінде ай сайын, содан соң жыл бойы тоқсан сайын, осыдан кейін – әрбір 6 ай сайын. Қан сарысуында калий мөлшері 5 мЭкв/л асатын немесе креатинин 4 мг/дл асатын болғанда спиронолактон қабылдауды уақытша немесе толықтай тоқтату керек.
• Порфириясы бар пациенттерде Верошпирон^® препаратын аса сақтықпен қолдану керек, өйткені көптеген препараттар порфирия өршуіне түрткі болады.
• Лактоза жақпаушылығы жағдайында Верошпирон^® препаратының әр таблеткасында 146,0 мг лактоза моногидраты бар екендігін ескерген жөн. Бұл препаратты галактоза жақпаушылығы, толық лактаза жеткіліксіздігі немесе глюкоза-галактоза мальабсорбциясы синдромы сияқты сирек тұқым қуалайтын аурулары бар пациенттер қабылдамауы керек.

-Препарат қабылдағанда алкоголь тұтынуға тыйым салынады.

Жүктілік

Препаратты жүктілік кезінде қолдануға болмайды.

Спиронолактон немесе оның метаболиттері гематоплацентарлық бөгет арқылы өтеді.

Емшекпен қоректендіру

Спиронолактон метаболиттері емшек сүтінде анықталмаған. Спиронолактон қолдану қажет болған жағдайда бала емізуді тоқтату және бала емізудің басқа тәсілін пайдалану керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Емдеудің басында ұзақтығы әркімде жеке белгіленетін уақыт кезеңінде көлік құралдарын және қауіптілігі зор механизмдер басқарудан бас тартқан дұрыс. Одан әрі әр жеке пациентте осы шектеуге әрқайсысының ерекше қырынан келу керек.

Артық дозалануы

Симптомдары: спиронолактонмен артық дозалану оны қабылдау аясында байқалатын жағымсыз реакцияларға жататын жағдайлар мен симптомдарды туындатуы мүмкін (мысалы ұйқышылдық, сананың шатасуы, макулопапулезді немесе эритематозды бөртпе, жүрек айну, құсу, бас айналу, диарея). Сирек жағдайларда гипонатриемия немесе гиперкалиемия байқалуы мүмкін, әсіресе бүйрек функциясы бұзылған пациенттерде; ауыр бауыр аурулары бар пациенттерде артық дозалану бауыр комасына әкелуі мүмкін.

Емі: симптоматикалық, арнайы антидоты жоқ. Су-электролиттік және қышқылды-сілтілік теңгерімді калий шығаратын диуретиктерді тағайындаумен, инсулинмен бірге глюкозаны парентеральді енгізумен, ауыр жағдайларда – гемодиализ жүргізумен сақтап тұру керек.

Шығарылу түрі және қаптамасы

20 таблеткадан поливинилхлоридті үлбірден және алюминий фольгадан жасалған пішінді ұяшықты қаптамада.

1 пішінді қаптамадан медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынады.

Сақтау шарттары

25 ⁰С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші ұйым

«Гедеон Рихтер» ААҚ

1103 Будапешт, Дёмрёи к-сі, 19-21, Венгрия

Тіркеу куәлігінің ұстаушысы

«Гедеон Рихтер» ААҚ, Венгрия

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электрондық пошта):

«Гедеон Рихтер» ААҚ ҚР өкілдігі, Алматы қ., Төле би к-сі 187

E-mail: info@richter.kz

Телефон: 8-(7272)-58-26-22, 8-(7272)-58-26-23

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық пошта):

«Гедеон Рихтер» ААҚ ҚР өкілдігі, Алматы қ., Төле би к-сі 187

E-mail: pv@richter.kz

Телефон: 8-(7272)-58-26-22, 8-(7272)-58-26-23, 8-701-787-47-01

Дәріханалар

Қалалар